محمد العمروسي: أحمد آدم قيمة كبيرة وأرجو الاهتمام بقامتنا الفنية
علق الفنان محمد العمروسي، على الأزمة المثارة ما بين المؤلف محمود حمدان والفنان أحمد أدم خلال الساعات القليلة الماضية، وذلك بعدما كشف عن موقف مؤثر جمعهم في بدايته الفنية.
وفي هذا السياق، علق محمد العمروسي، عبر حسابه الرسمي بموقع التواصل الاجتماعي «فيسبوك» على أزمتهم، قائلا: «البوست ده حتى لا ننسى الفضل بيننا الأستاذ أحمد آدم أستاذ ونجم كبير طاقة فنية وثقافية كبيرة ومن أعلام الفن المصري وليه رصيد كبير و الأعمال اللي استمتعنا بيها».
كما أضاف محمد العمروسي: «وليه في رقبتي كلمة حق أنا اشتغلت مع أستاذ أحمد سنة 2005 مسرحية برهومة على مسرح جلال الشرقاوي، وقتها كنا بندرس في معهد فنون مسرحية والدكتور جلال هو اللي رشحنا للشغل».
وأردف: «لما اشتغلت معاه وكنت حابب إني أضيف حاجة لدوري روحت وقولتله إنى عايز أعمل حاجة في الدور، وقالي سمعني ولما سمع قالي حلو تعالا نجرّبه النهاردة فعلا قولنا والناس ضحكت وخدنا تسقيف كبير من الناس فرح وهو على المسرح قالي حلو ده نثبته».
وتابع: «وفي نفس السنة كنت بعرض معاه وذهبت إلى بني سويف وحصل الحادث الكبير حريق مسرح بني سويف، وكان من أوائل الناس اللي جتلي المستشفى ومكنش عايز يمشي وكان كل يوم يطمن عليا وبعتلي إيهاب مدير أعماله بمبلغ كبير علشان العلاج».
وواصل: «لما رفضت آخد المبلغ إيهاب كلمه وقاله محمد مش عايز ياخد الفلوس، كلمني وقالي أنا عمك وزي أبوك خدهم قولتله والله أنا معايا أهلي هنا والحمد لله ولو احتاجت أي حاجه إنت أول حد هكلمه».
واختتم محمد العمروسي، حديثه، قائلا: «اللي أنا عايز أقوله من البوست الطويل ده إننا كلنا بنقع وبنقوم أنا عارف إن صديقي وأخويا المؤلف محمود حمدان متضايق من موقف حصل معاه زمان وعارف إن ممكن يكون أستاذ أحمد كان غلطان في موقفه».
وأضاف: «لكن اللهم لا شماته لأن لو دامت لغيرك مكنتش جتلك وكلنا اتعرضنا لظلم كبير في بداية حياتنا لكن المسامح كريم، وأستاذ أحمد قيمة وقامة كبيرة وأرجو من كل القائمين على الفن المصري النظر والاهتمام بقامتها الفنية».
اقرأ أيضا:
أبرزهم وش السعد.. محمد العمروسي يكشف لـ «الأسبوع» تفاصيل أعماله في دراما رمضان 2025
مي فاروق تهنئ زوجها محمد العمروسي بعد مشاركته في مسلسل «حكيم باشا»
صورة محمد العمروسي مع أبنائه الثلاثة تتصدر التريند بعد رد مي فاروق
